:download:Ji berhevoka "Çirûsk û Xwelî"
- Derdê gelekan ji me ew e ku me ti derd nînin.
- Em barê xwe bi îdeolojiyan giran dikin.
- Diktator jî bi hêz û vîna gel dijîn.
- Jiyan xewnek e, mirov dibîne.
- Çawa Yezdan û Şeytan nîn in? Pa mirov çi ne!?
- Piştî dest bi nivîsê kir, dev ji xwendinê berda.
- Ez kêm caran hemfikir im - ta bi xwe re jî.
- Her ramyar û ramanwerek gir û gewre, tûle û tolazek bêkêr û bêwec e.
- Keçik delal e - hindî te ew tazî nedîtibe.
- Ev dinya derewîn e - û ya bêt hê derewîntir e.
- Dîrok heqiyê rast dernaxe.
- Dê hemî hêviyên me bi cî bên? Xwedê neke.
- Ji roja min dest bi temaşe- û guhdarîkirina nûçeyan kiriye, êdî nizanim ka bi rastî çi li dinyayê diqewime.
- Mezintirîn nivîskar ti carî ti tiştî nanivîsin.
- Bawerî çi û çawan be jî, heke alîgirên wê bûn gelek, ew dibe bela.
- Gel bi xwe tewanbarî wê zordariyê ye ya lê tê kirin.
- Her nivîskar, çend ku dibêje, gelek car hind vedişêre jî.
- Sansûra mezin ne Dadgeha Ewlehiya Dewletê lê tu bi xwe yî.
- Gelo ma qehremanên qehreman hene?
- Hevalên hertim hemfikir hevalên derewîn in.
- Di her henekbêjekî de gelek xemgîn dijîn.
- Reşbîn be daku dilsar nebî.
- Li evînê negere daku wê nebînî.
- Dîrok me fêrî hunera derewkirinê dike.
- Tenê sernerm dikarin jîr bin.
Tenê serhişk dikarin dahî bin.
- Ti tiştek ji vê berhemê bê sansûr nemaye - ta ev hevok jî.
- Eger hemû hemfikir bin, hemû kêmfikir in.
- Ti tiştî hindî ramanên mezin mirovên bêguneh nekuştine.
- Zemawenda min û Xemê ye.
- Hêvî heye lê bela serê me ye.
- Mirovên nizanin sade bijîn, tê dikoşin bibin bilîmet.
- Herdem ji bîr dikim ku bawerî bi mirovan nabe.
- Roj nîne neqehirim - derman e.
- Xwe ji rêbaz û prensîpan azad bike.
- Türk Dil Kurumu: Saziya Zimanê Tirkî.
Medya Tv: Saziya Zimanê Tirkî bo Kurdan.
- Ew ne mirovên mezin in yên bi karên mezin radibin ji ber ku nikarin ên biçûk bi cî bînin.
- Her dîn ne dahî ye.
- Bi xwe serxweş im - alkohol pê nevê.
- Evîn xapandin e - xwexapandin jî.
- Heke ji dil bixwazî qenciyekê bikî, hew qenciyê bike.
- Gelo ma ne dîn û îmana min ji sloganan diçû? Pa ev çi ne ez dinivîsim?
- Jîrî û zanayî mirovî dikujin.
- "Bê nan dibe lê bê azadî nabe." Ma ji vê mezintir derew hatiye kirin?
- Bêkesî ne xweş e, bikesî derdek bêderman e.
- Wî hind xwend ku rastiya jiyanê ji bîr kir.
- Li min negire, ez nikarim nenivîsim.
- Li mijaran negere, bihêle bila ew te bibînin.
- Kes ji wî xwelîsertir nîn e yê ramanên wî ji hêza wî zêdetir bin.
- Tu dê ticarî bêkêmasî nemînî lê ta ji te bê kêmasiyên xwe kêm ke.
- Bizane ku nivîskar û siyasetvanên bi dîroka gelê xwe dixwirrin û pesnan didin, bawerî bi hêz û şiyana îroyîn ya gelê xwe nîn e.
- Madem her tirkî ye,
ferq çi ye?
- Hertişt niha hind xweş e ku min nexweş dike.
- Ma kî wek min xweş dinivîse - dema nanivîsim!
- Min ev hemî gotin kirine? Na! Kirmê di min de.
- Sansûr tiştek baş e. Heke sansûr nebe, ez dê neçar bimînim xwe bispêrim xwesansûriyê.
- Dostaniya dostên hemfikir ne kûrtir e ji hemfikiriyê
- Heke nikarî xwe biguherînî, dinyayê biguherîne.
- Entelektuel? Ka?
- "Biratiya gelan" şirîntirîn peyv e ku min bihîstiye - û xapînoktirîn jî.
- Ew çi demokrasî ye heke mirov nikare bibêje: ev ne demokrasî ye?
- Hemî ne-pozbilind derewker in.
- Dîrokê peyitandiye ku pirraniya zordaran carekê aştîxwaz bûn.
- Li vî zemanî gelek aqiltemam jî xwe dîn dihesibînin; baştir biqedir dibin.
- Heke jiyan bêkêmasî ba, min dê nexwesta bijîm.
- Kêm kesên hezkirî kesên qenc in.
- Camêran broşûrên Ernesto "Che" Guevara difiroşin min, bi deh dolaran. Ser herdu çavan, ez ê bi dîwarê xwe ve bihilawîsim, bi deh dolaran - lê mixabin razî nebûn deh dolaran bidin min.
- Gelek nivîskar nedilşad in ji ber ku xwendevan nîn in an jî kêm in. Nayê bîra wan ku heke xwendevan gelektir hebin, dê kêmasî û nehêjayiyên nivîskar zêdetir nav û deng bidin.
- Madem Xwedê her tiştî dikarec, gelo ew dikare nikare?
- Siyasetvan tê dikoşin rêveberiya dewletan bikin ji ber ku nikarin rêveberiya zarokên xwe bikin.
- Ne ditirsim ku belayek bêt serê min, ditirsim ku ti tişt neqewime.
- Baş e ku pirraniya mirovan newêrek in. Wek din, wan dê xwe bikuşta.
- Du birr mirov hene: hinek mîna te ne û hinek jî ji te cuda ne. Û ti ji herduyan jî ji te hez nakin.
- Siyasetvan ji pesndana şehîdan hez dikin. Şehîd êdî ne xeter û talûke ne ji siyasetvanan re.
- Çare nîn e. Bila nebe. Hebe jî namîne.
- Ji hemî bîrdoz û bîreweriyan a herî gewer û pîroz xweperestî ye. - Dilê te jî wisan dibêje lê tu neheqiyê li xwe dikî û wê baweriya xwe difetisînî.
- Heke mirov bi xeman bimirana, gelek ji me dê ji vê rezaletê xelas bibana.
- Gelo ticarî tê bîra wan kesan ên wiha bi tundî û tûjî guhartinan dixwazin ku yên herî zêde pêdivî û hewcedarî bi guherînê heyî ew bi xwe ne?
- Kêm kesan hindî min bawerî bi dîn û îdeolojiyan hebû. Û kêm kes hindî min ji wan dilsar bûne.
- Pa vêca ew xwedayê mirovên hinde mejîreş û famkor afirandine bi xwe çawan e?
- "Biratiya gelan" çîroka Qabîl û Habîl e.
- Ez ne ewqas zîrek im ku bikarim sil bibim.
- De vêca were û bikare bibêje: "Ez ji te hez dikim."
- Daku jin ji te hez bikin, homo be.
- Çi sûde û feyde ji bilîmet û dahiyan heye?
Ew çend ramanan li pey xwe dihêlin û mirov sera wan ramanan bi milyonan ji hev dikujin.
- Heke Şeytan nebe, Yezdan dê bo çi be?
- Nivîskarî baştirîn tedawî û kembaxtirîn nesaxî ye.
- Îro li bazarê ev di guhên min de diçingî:
- Werinê, werin îdeolojiyan... germ û nerm... erzan û belaş... Werin îdeolojiyên niha biraştî.
- Xirab ji qencan gelek zêdetir in, û yên qenc jî ji nezaniya xwe qenc in.
- Bilîmet bêkes in lew heval û hogirên min pirr in.
- Çiku ne ya min e, pirr dixwazim; ger a min ba, ez dê jê birevîma.
- Xemgîn î ku berhemên te nayên weşandin? Ez hê zêdetir xemgîn im ku berhemên min tên weşandin û dikevin meydanê û herkes dikare wek gogê pê bilîze.
- Olen onnellinen siitä, että teillä on minut ystävänänne.
(Bextiyar im ku we hevalek wek min heye.)
- Heke yekî derd nebin jî, ji xwe re peyda dike.
- Gelo Xwedê jî serbilind e? Bi çi? Pirr ditirsim ku bi mirovan!
- Xwelî li wî yê tê bikoşe şert û mercên wêjeyî û edebî di berhemên xwe de bi cî bîne: ew rastiyê ji bîr dike!
- Piştî ku min ew nas kir, êdî piştrast im ku dahî û bilîmet mirovên herî pepûk in.
- Radîkal: ew kes yên ku tê dikoşin dinyayê biguherînin ji ber ku nikarin xwe biguherînin.
- Evîna dualî? Ew çi ye?
- Pirsgirêk ne ew e ku ew kêm ji min hez dike. Pirsgirêk ew e ku ez zêde jê hez dikim.
- Heke bixwazî ji her tiştî nerazî bî, dê jê nerazî bî.
- Kurdî ne tenê ew e ya ez dizanim.
- Li şûna bindestî stemkar û zordarê azadîxwaz baştir e mirov bindestî stemkar û zordarê basa azadiyê nake be.
- Demokrasî jî dogmatîk e: nahêle mirov ne-demokrat be.
- Em hemî ne nezan in; pirraniya me îdiyot in.
- Mirov ji aştiyê aciz dibe lê min nebihîstiye ku ti zordarek li xwe poşman bûye.
- Heke tu bi min re ne hemfikir bî, tu şaş î. Lê ev nayê wê wateyê ku heke tu bi min re hemfikir bî, tu dirist î.
- Hertim ditirsim ji dest bidim tevî ku baş dizanim ku ticarî ne ya min bûye û ne jî dê ya min be!
- Tenê wan şevan dinasim yên xewa min nayê.
- Kî bêaqilî gotiye ku nezanî mirovan bextreş dike?!
- Rûpûş, eba û kevînk bedewiya gelek jin û keçan vedişêre - û kirêtiya hê gelektiran.
- Felsefeya jiyanê? Madem jiyan nebe, felsefeya wê bo çi ye!?
- Hind baweriya min pê têt ku bawer nake baweriya min pê têt.
- Dema ez li mirovan dinerim, dibînim ku Adem û Hawa gelek neşirîn bûn.
- Bo ku dahî bî, ne hewce ye dîn bî lê divê xwe bi xelkê dîn bidî pejirandin.
- Hemî siyasetvanên hezkirî derewkerên zîrek in lê mala Xwedê ava ku hemî derewkerên zîrek ne siyasetvan in; gelek ji wan yên bijare nivîskar in.
- Ez bi tundî dijî xwe me.
- Ji evîndarên berê û bitecrûbe bipirse daku bizanî ka evîn çi xwelî ye.
- Demokrasî jî zordestî ye: ji bilî xwe ti rêbazên din qebûl nake.
- Bê xem nikarim tiştekî binivîsim.
- Hemî jiyana min henekek e, henekek kes naxwaze pê bikene, yariyek kes nalîze.
- Hemî mirov dikarin bibin nivîskar lê tenê qeşmer dibin nivîskar.
- Çima xwe mirov bihesibînin? Ma ew hêjayî hindê ne?
- Me zimanê xwe ripîrût kiriye ji ber ku em newêrin "devokanî" binivîsin û bipeyivin.
- Demokrasî jî bêdilî mirovan li ser wan hatiye ferzkirin.
- "Mirov aqilê xwe ji bêaqilan digire." Madem wisan ne, gelek kes bi saya min jî biaqil bûne.
- Ew pirsgirêk in yên tu dibêjî!? Heke wan, yên tu bawer dikî ku pirsgirêk in, pirsgirêk bihesibînî... ka ji berxa ber dilê xwe re bibêjim: te pirsgirêk nedîtine!
- Heke herdem tiştê bêt têgihiştin û hezkirin binivîsim, ez dê ticarî tiştek watedar nenivîsim.
- Roj nîne dilê min bi vê gula çilmisî neşewite lê her roj ji xwe re dibêjim: bila avdana wê bimîne sibê.
- Dixwazim bibînim daku dilsar bibim.
- Rêzgirî û hirmeta min ji her baweriyê re heye lê divê ew xwe biguherînin.
- Nivîskar: ew kes in yên nikarin derewên xwe yên sade bi xelkê bidin bawerkirin loma pirtûkan dinivîsin daku bi bihaneya wan derewên xwe belav bikin.
- Pirraniya mirovan mîna mihan sernerm in, û kî bixwaze dikare bibe şivanê wan. Û bi sond jiyana van mihmirovan tijî dilşadî ye.
- "Cogito ergo sum." René Descartes şaş bû. Wî dixwest bibêje: "Em hene lê em nafikirin."
- Heke bixwazî xelk xulamî te be, jê re bibêje ku tu xizmeta wan dikî; siyasetvan jî wisan dikin.
- Xem gelek xweş in. Yên ji ber wan gilî û gazinan dikin, hema xem nedîtine jî.
- Hergav ku têr gû dipeyivim, mijarê diguherînim û dest pê dikim tenê gû bipeyivim.
- Sosyalîzm: belaya serê zengînan - û feqîran.
- Raman û kirin pirrî caran dûrî hev in. Mala Xwedê ava.
- Bextiyarî ne ti armanca jiyanê ye.
- Em dijîn daku em bimirin.
- Mirov dê her bimire, hindî zûtir e, çêtir e.
- Hew gazinan bikin. Derew e ku di rewşek xweş de mirov bextiyar be. Tenê bi têkoşîn û xebata berdewam dijî astengî û pirsgirêkan mirov dikare bextiyar be; ne bi biserketinê.
- Ti tiştî hindî NE-ezperestiya me ziyan negihandiye me; xelkê dilpakiya me baş ji xwe re bi kar aniye. Di nav vê 'xelkê' de gelek kurd jî hene.
- Bi hêcet û bihaneya yeketî û yekdengiya kurdan bi hezaran kesên behredar û ramanwer hatine sermihkirin.
- Ti tiştek wek bêhêvîtiyê hêzê nade mirov.
- Nebîne daku bêriya wê nekî.
- Eger dilê min nehatiba şkandin, min ê dilê gelekan bişkanda.
- Ramanên nû pirr baş in - hindî neketibin pratîkê.
- Mirov im, ji bîr nakim. Lê nizanim mirovbûn tê çi wateyê.
- Yezdan, ez di gelek biwaran de bêhêz im, û min di gelek ji wan de her bêhêz bihêle!
- Kerb hêz e.
- Yezdan, hind gelek ji keçikê hez dikim ku hêvî dikim ku Tu min nekî bela serê wê!
- Qehreman jî tenê keysperestên rewşa kembax in.
- Her pirtûkek jiyanek e - jiyanek wek ya me derewîn.
- Mirov çi bike jî, dîsan jî dibe xweşmirov be.
- Yezdan, vê duaya min qebûl neke!
- Eger dixwazî binivîsî, tenê hevalekê ji xwe re peyda bike: tenêtiyê.
- Derdê dukesiyê derdek bêderman e.
- Ez jî gelek keyfreş im bi nameyên te.
- Ji quretiya xwe nefsbiçûk im.
- Destkeftiyên qehremanan diyar û berçav in - term hê nehatiye binaxkirin.
- Hindî hevaltiya me nêzîktir dibe, baştir tê digihim ka em çend dûrî hev in.
- Ji kû bizanim ka tu bênfire yî yan sersar î?
- Dema min nîne navdar bim.
- Her dinivîsim - bi hêviya rojekê êdî nenivîsim.
- Wê bêje ya bêt ber devê te; eger bifikirî, dê derewan bikî.
- Ne ji ber jêhatîbûna xwe lê ji ber serhişkiya xwe bi ser ketime.
- Pirraniya me ji ezperestiya xwe qenciyê dikin.
- Bo ku xelk ji te razî be, wisan neke ku tu bi xwe ji xwe nerazî bî.
- Xeman rêya vegotinê li min girtiye.
- Evîn: jehremar.
- Demokrasî ji bilî berjewendîperestiyê ne ti tişt e. Û divê her wisan bimîne jî.
- Gelek xirab ji 'qencan' çêtir in ji ber ku xirabiya wan aşkira ye.
- Eger dilê te bi xelkê bişewite, bizane ku hingê divê dilê te bi te bişewite.
- Min dem nîne hesûd bim.
- Lê nenerî, pozbilind î. Lê binerî, ji bêçaretiya xwe wa dikî.
- Belê, S..., dikarim bi gelek zimanan biramim ji ber ku ramanên min pirr sade ne.
- Hindî xunava memikên te hebin, ma mey bo çi ye?
- Xweştirîn çîrok û helbest ew in yên di xewn û xeyalên me de zindî ne lê em nikarin zeft bikin.
- Min bikuje lê dilê min bi xwe neşewitîne.
- Hindî zêdetir dibêjî, kêmtir guh didim te.
- Ti car ne cidî be daku nebî pêkenok.
- Mirovatiya bê ceng û şer ne ti mirovatî ye.
- Di siyasetê de tenê yên ne berpirsiyar dikarin rastgo bin.
- Tenê kul û kovan dikarin bi agirê xwe dilê min germ bikin.
- Di her rastiyekê de gelek derew veşartî ne.
- Ti sinor hindî yên dilê te teng nînin.
- Her nûxwaz paşî dibe kevneperest.
- - Rastiyê bibêje.
- Kîjan rastiyê?
- Her tiştî du rû hene: yek tirş e û yê din jî tal e.
- Kêm kes rastgo ne, herî kêm jî bo xwe.
- Xwendin dikare çavan kor bike - bi mecazî jî.
- Di şer de tiştê rast jî derew e.
- "Umrê borî êdî nayê." Mala Xwedê ava ku tam wa ye.
- Daxwaza parastina aştiya neyî nakim.
- Eger ti kes ji te hez neke, bizane evîna te hind berz û bilind e ku kes nagihiyê.
- Plankirin ango nekirîhiştin.
- Şer rewşa normal e.
- Carinan sed heval û hogir jî nabin derman bo tenêtiya min.
- Bextiyar ew e yê li bextiyariyê negere.
- Mirov wa hov û barbar in ku nikarin heywan bên hesibandin.
- Baş bû ku hingê baweriya min ew bû tevî ku niha dizanin jî ku ew bawerî şaş e.
- Reşbînî ne rastbînî ye.
- Bi rastî aciz bûme ku her "nivîskar" gazinan dike ku nivîsîn dijwar e. Madem wa ye, bila nenivîsin.
- Xelk dixwaze şerr hebin daku xwepêşandanan bikin û bibêjin divê şerr nebe.
- Evîn bivok û xeter e; ji ber wê min gelek heval û hogir ji dest dane.
- Xwezî min nexwesta binivîsim daku tiştek bo nivîsînê bihata bîra min.
- Xwezî min hew bigota xwezî.
- Hind dijwar e berbijarek baş bibînim da dengê xwe bidimê ku bi xwe bûme berbijar.
- Armanc her xweperestî ye. Armanca hemûyan. Armanca te jî. Armanca min jî. Armanca vê pendê jî.
- Nivîskar: komek mirovên tiştek din ji destan nayê.
- Mirov dikare herdem bextreş be.
- Ti tişt wek wê nexweş nîne ku dijminê xwe birîndar bibînim.
- Bi diyarkirina piçek rastiyê dixwazin gelek rastiyê veşêrin.
- Guhdarîkirin lê nebîstin yek ji hinêr û şiyanên giring e.
- Em pirr pêşketî ne - bi hunera parastina derewên xwe.
- Her kes nikare bibe nivîskar: her kes ne hind delodîn e.
- Ev çi ye ku kesa/ê hat, dibêje: 'Evîna min dastanek bû!' Welle ya min tenê serêşî ye, serêşiyek temam.
- Ti kes ji dostên qenc xirabtir dernakevin.
- Dîroka evînê dîroka bextreşiyê ye.
- Komunîzm: "Her tiştê te yê min e jî lê yê min ne yê te ye jî."
- Bila em kêm bin da tiştek ji me bêt.
- Herdem hêvî heye lê carinan ne pêdivî ye.
- Camêr goştê berazan naxwe ji ber ku ne kannîbalîst e.
- Di her derewê de rastî veşartî ye.
- Du birr jin bextreş: yên kirêt û yên bedew.
- Dîsan gulek bo biçilmise geş bûye.
- Ta giham pesna te bidim, te qenciya xwe ji bîr kir.
- Di peyvên şirîn de ti rastî nîne. Û di peyvên tal de jî.
- Eger ne bi xêra newêran ba, niha mirovek jî sax nemabû.
- Berê ez ker bûm ku min wisan dikir. Niha kertir im ku wisan nakim.
- Yên xwelîbiser her tepeser in, vêca çîna serdest ya xanedanan, ya bazirganan yan jî ya karkeran be.
- Rastî hêjayî pesndanê ye - eger li gor berjewendiyan be.
- Divê yên bixwazin xwe bikujin bên lisêdaredan daku kes çav li wan neke.
- Ma Nietzsche negotiye: "Tu dê biçî cem jinê? Şivê ji bîr neke!"
- Kes ne dahî ye lê gelek kes xwe bi kar û xebatê dikujin.
- Zerer û ziyana pasîfîstan ji ya şerxwazan pirrtir e.
- Bê xapandin nameşe.
- Ez ne "mirovên qenc" û ne jî "mirovên xerab dixwazim"; "mirov" tenê bo min bes in.
- Ti kes ne gelek giring e.
- Ji xweperestî û partîperestiyê, xweperestiyê bibijêre.
- Xwezî aştîxwazan bizaniya ka ew bi rastî çi dixwazin.
- Mirov ecêb in: nikarin rojekê jî bê xem bijîn.
- Bawer nakim ku tişta objektîv rast be.
- Eger ne ji pozbilindiya min ba, min qencî nedikir.
- Derdê min: alîkariya hevalên xwe ji dil nekim, ez bawer dikim ku ne dilpak im; ji dil bikim, ew bawer dikin ku ne ji dilpakiyê dikim.
- Dixwazim bi agirê awirên te bişewitim.
- Gelek kes bo "ben kürdüm" xwe didin kuştin lê nabêjin "ez kurd im".
- Jihevkirina rastiyê û nerastiyê bêhed dijwar e lê dikarim ji tiştekî bêşik piştrast bim: ne ronakbîr im û ne şoreşgêr im û ne jî dixwazim yek ji wan û ne jî ew herdu bim.
- Li çolistana min ya hişk û beyar xunav tenê ji çavan dibarin.
- Yê xirabiyan neke, qenciyan jî nake.
- Ta jê dûr nebî, qedrê wan nizanî.
- Quretiya wî em ji mirinê xilas kirin.
- Ceribandin tehlîke ye: Xwedê jî xwe ceriband û encam derket mirov.
- Petrol - bereket û xezeba Kurdistanê.
- Yê ne xweperest be, ehmeq e.
- "Hemû jiyana xwe li xwe gerîme." Ê welleh te ti nekiriye.
- Qehremanê berê ne ti qehreman e.
- Gelek xirab hene û pirraniya wan tê dikoşin daku xelk li gor daxwazên wan bê bikaranîn. Ditirsim ku mixabin ez bi xwe jî ji wan im.
- Du birr jin hene: kirêt û makyajkirî.
- Rastgo be - bo xwe.
- Jin gul e. Avdanê ji bîr neke.
- Yê nikare galteyan li xwe bike, nikare li xelkê jî bike.
- Rastiya neyê bawerkirin nebêje.
- - Ew kî ne?
- Du tirkîziman û pênc jî kurdînezan.
- Nizanim çima ji helbestên tê nagim hez dikim.
- Ti tiştî bi temet evînê rêyên rûreşiyê nedane ber min - ji wan rûreşiyan ya herî mezin nivîskarî.
- EXLAQ E: veşartina rastiyan, pejirandina derewan, kuştina hêviyan, koletiya partiyan...
- Aştî xweamadekirina ji bo şer e.
- Nûçeyên şer filmên xweş in.
- Bê gan nameşe.
- QANÛN: Bend 1. Ti qanûn nîne. Bend 2. Yê bi benda 1 neke, dê bêt cezakirin.
- Bişar Axa gotiye: "Ez her axa me, serok Sedam be, Telebanî be, Barzanî be yan jî Öcalan be."
- Eger hin gotinên nexweş derbareyî te bibêjin û tu bizanî ku ew gotin ne rast in, xemgîn nebe. Bifikire ka dê çend nexweştir ba eger ew gotin rast ban.
- Yê jiyanek xweş hêvî kiribe, piştî bidestxistina armanca xwe poşman bûye.
- Di aşop û xeyalên min de bêhejmar refên çîrokan difirrin. Û dema pênûsê digirim destê xwe, hemû li asoyê wenda dibin.
- Agirê te dê min bike xwelî.
- Çi li vî dilî bikim ku li te bûye bela?
- Rastî jî kêm caran baş e.
- Kerem bike bibijêre: berjewendiyên xwe yan yên Serok.
- Nezanî hêz e, zanîn bêhêvîbûn e.
- Hinek di şer de mirin. Yên mayî jî xwe li ser serê me mezin dikin.
- Camêrekî kerem kiriye: "Çawan şoreş ti tiştî naguherîne? Navên serokan diguherîne."
- Heqdar e ku baweriya wê bi min nemaye ji ber ku min herdem ew ji xwe giringtir dîtiye.
- Demokrasî: Hêza gel. (Na na, ez tirrane û tinaziyan dikim.)
- Ti tiştekî mîna "yeketiya kurdan" kurd bêmejî nehiştine.
- *De vêca were bizane ka rastî çi ye!
- Ti çare nîne - ji xweperestiya xwe serbilind be.
- Xweperestiya wî gelek kes parastine.
- Jiyan ziyan e.
- Qet bawer neke. Ji van gotinan jî.
- Bextewer im ku dema min têra hem nivîsînê û hem jî xwesansûriyê nekiriye.
- Ya herî giring her negotî dimîne.
